2024 жылдың 22 қарашасында Әл-Фараби атындағы ҚазҰУ-де «Цифрлық трансформация жағдайындағы кедендік әкімшілендірудің заманауи сын-қатерлері мен перспективалары» атты халықаралық ғылыми-практикалық конференция өтті. Конференцияға профессорларымыз А.А. Аубакирова мен С.Ж. Шалтакбаев қатысты.
Заң ғылымдарының докторы, профессор Сайлаубек Тынышбекұлы Әлібековтың 70 жылдығына арналған іс-шара Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын іске асыру аясында, сонымен қатар Әл-Фараби атындағы Қазақ ұлттық университетінің 90 жылдық мерейтойына орай өткізілді. 
Конференция ТМД елдерінің ғана емес, алыс шетелдердің кедендік әкімшілендіру саласындағы жетекші ғалымдары мен практиктері арасында тәжірибе алмасу және конструктивті диалог жағдайында өтті. Бұл шара жаһандық цифрландыру жағдайында кедендік әкімшілендірудің заманауи мәселелерін шешуде ғылыми жұртшылықтың қызығушылығын танытты.
Қатысушылар цифрлық трансформация жағдайында кеден жүйесінің алдында тұрған өзекті мәселелер мен сын-қатерлерді талқыға салып, сондай-ақ Қазақстан Республикасы және өзге де елдердегі кедендік әкімшілендірудің тиімділігін, әділеттілігі мен ашықтығын арттыру мақсатына бағытталған жаңа тәсілдер мен шешімдерді ұсынды.
Заманауи технологияларды кедендік процестерге интеграциялаудың маңыздылығы және осы салада жұмыс істей алатын білікті кадрларды даярлау қажеттігі атап өтілді.